Jólatré, hanúkkuljósastika og mánasigð. Í bakgrunninum má sjá ljósum prýtt grafhýsi Bábsins, næsthelgustu byggingu bahá’í-trúarinnar. (Mynd: igoogledisrael.com)
Á einungis tíu árum hefur meðlimum MIFF samtakanna í Noregi fjölgað úr 2.000 í um 11.000 félaga. Ef íslenskir vinir Ísraels þétta raðir sínar á sama hátt getum við byggt upp hreyfingu sem afhjúpar falsfréttir, flutt nýjustu fréttir um Ísrael og verið farvegur þeirra sjónarmiða. Þetta gerum við m.a með því að byggja upp góðan upplýsingagrunn með faglegri heimasíðu og nýta mátt samfélagsmiðla til að koma upplýsingum áleiðis.
Vertu með í MIFF á Íslandi

Það ríkir sannkölluð hátíðarstemning í hafnarborginni Haífa þessa dagana. Tvær síðustu helgarnar í desember iðar borgin af lífi á meðan íbúar borgarinnar halda hátíð sem fagnar trúarlegum fjölbreytileika í Ísrael, og dagana 19.-28. desember mun fólk geta sótt ýmsa viðburði sem tengjast hátíðinni. Hátíðin er einfaldlega kölluð „hátíð hátíðanna“ og var fyrst haldin árið 1993, en tilgangur hennar er að stuðla að friði á milli trúarhópanna. Tímasetningin var valin vegna þess að bæði jólin og hanúkka eru haldin á þessum árstíma, þótt uppruni hátíðanna sé ólíkur. Einnig er gefinn gaumur að öðrum trúarsamfélögum í borginni – t.d. drúsum og múslimum en allur gangur getur verið á því hvort einhver af hátíðum þeirra beri upp á þessum tíma þar sem dagatal þeirra byggist ekki á gangi jarðar um sólina. Það líða u.þ.b. 33 ár á milli þess að hátíðirnar beri aftur upp á sama árstíma.

Í tilefni hátíðarinnar fá gestirnir tækifæri til að staldra við fjölda sölubása, listsýninga, tónleika og fjöllistaatriða svo fátt eitt sé nefnt. Viðburðirnir eru haldnir í arabíska hverfinu Wadi Nisnas og í hverfi sem er kallað „Þýska nýlendan“, en skammt frá því er grafhýsi Bábsins, þar sem annar af tveimur stofnendum Bahá’í-trúarinnar er grafinn. Grafhýsið og garðarnir umhverfis það eru líklega þekktustu kennileiti Haífa. Bahá’í-trúin á rætur að rekja til íslam en hún er engu að síður bönnuð í mörgum múslimalöndum. En Ísraelsríki hefur alla tíð tryggt öryggi höfuðstöðva þeirra og helgistaða.

Í ár er hátíð hátíðanna haldin í tuttugasta og sjöunda sinn og hefur hún vakið mjög jákvæð viðbrögð gesta og heimamanna. Samlíf fólks af ólíkum trúarbrögðum í Haífa hefur veitt uppbyggilegt fordæmi í heimshluta þar sem deilur á milli trúarhópa hafa allt of oft leitt til blóðugra átaka.